Тылы харыстыыр, үйэтитэр уонна сайыннарар сыаллаах государственнай программа чэрчитинэн Саха Өрөспүүбүлүкэтин министерствотын культуратын уонна духуобунаһын өйөөһүнүнэн, Өрөспүүбүлүкэтээҕи норуот айымньытын дьиэтэ көҕүлээһининэн тохсунньу ый 24 күнүгэр Д.Ф.Ходулов аатынан култуура киинигэр«ТуоС» – тыл уонна сатабыл саха тылыгар 9-11 кылаас оҕолоругар интеллектуальнай оонньуу ыытылынна. Оонньууга уопсайа 5 хамаанда кыттыыны ылла. В.П. Ларионов аатынан Майа орто оскуолата, дириэктэр Васильев Павел Васильевич («Чыпчаал» хамаанда); Ф.Г. Охлопков аатынан Маҋа орто оскуолата, дириэктэр Захаров Андрей Вадимович («Ситим» хамаанда); И.Г.Тимофеев аатынан Майатааҕы лицей, дириэктэр Попова Татьяна Спартаковна («Үрдэл» хамаанда); И.Г.Игнатьев аатынан Харатааҕы спортивнай орто оскуола, дириэктэр Оконешников Алексей Алексеевич («Күн оҕолоро» хамаанда); В.В.Скрябин аатынан Чүүйэ орто оскуолата, дириэктэр Попов Николай Семенович («Хатан» хамаанда).
Оонньуу биэс түһүмэҕинэн ыытылынна:
1 түһүмэх. Бэйэни билиһиннэрии видеоролига.
2 түһүмэх. Саха тылын билиитин тургутуу.
3 түһүмэх. Араас темалаах интерактивнай оонньуу.
4 түһүмэх. Саха төрүт атах оонньуута.
5 түһүмэх. Өйтөн айымньы айан таһаарыы.
Тыҥааһыннаах күрэх түмүгүнэн:
1 миэстэ – Yрдэл
2 миэстэ – Хатан
3 миэстэ – Күн оҕолоро
Миэстэлэспит хамаанда сыаналаах бирииһинэн, кубогынан наҕараадаланна.
Оҕолор төрөөбүт төрүт тылларын билиилэрин хаҥатан, үөрэ-көтөн чаҕылыһан тарҕастылар.
Олунньу 13 күнүгэр – тыл уонна сурук-бичик күнүгэр Дьокуускай куоракка өрөспүүбүлүкэ таһымнаах күрэххэ кыайыылаах хамаанданы күүтэбит!






