ТуоС в Амгинском районе

Тылы харыстыыр, үйэтитэр уонна сайыннарар сыаллаах государственнай программа чэрчитинэн Саха Өрөспүүбүлүкэтин министерствотын культуратын уонна духуобунаһын өйөөһүнүнэн, Өрөспүүбүлүкэтээҕи норуот айымньытын дьиэтэ көҕүлээһининэн тохсунньу ый 17 күнүгэр Федот Федотович Потапов аатынан Норуот айымньытын дьиэтигэр Амма улууһун киинигэр «ТуоС» – тыл уонна сатабыл саха тылыгар 9-11 кылаас оҕолоругар интеллектуальнай оонньуу ыытылынна. Е.Е.Пахомова аатынан Болугур орто оскуолата, В.Г.Короленко аатынан Амматааҕы 1 №-дээх орто оскуола, Е.А.Шишигина аатынан Сатаҕай орто оскуолата, П.И.Караканов аатынан Мээндиги орто оскуолата, академик Л.В.Киренскэй аатынан Амматааҕы лицей уопсайа 5 хамаанда кыттыыны ылла.

Күрэх 5 түһүмэҕинэн ыытылынна:

  • 1 түһүмэх. Бэйэни билиһиннэрии видеоролига.
  • 2 түһүмэх. Саха тылын билиитин тургутуу.
  • 3 түһүмэх. Араас темалаах интерактивнай оонньуу.
  • 4 түһүмэх. Саха төрүт атах оонньуута.
  • 5 түһүмэх. Өйтөн айымньы айан таһаарыы.

Тыҥааһыннаах күрэх түмүгүнэн:

  • 1 миэстэ – В.Г.Короленко аатынан Амматааҕы 1 №-дээх орто оскуола
  • 2 миэстэ – П.И.Караканов аатынан Мээндиги орто оскуолата.
  • 3 миэстэ – академик Л.В.Киренскэй аатынан Амматааҕы лицей.

Миэстэлэспит хамаанда сыаналаах бирииһинэн, кубогынан наҕараадаланна. Хас биирдии кыттааччы оҕо тэрийээччилэртэн бэлэх тутта.
Оҕолор төрөөбүт төрүт тылларын билиилэрин хаҥатан, үөрэ-көтөн чаҕылыһан тарҕастылар.

Олунньу 13 күнүгэр – тыл уонна сурук-бичик күнүгэр Дьокуускай куоракка өрөспүүбүлүкэ таһымнаах күрэххэ кыайыылаах хамаанданы күүтэбит!

Таҥха хаан ыйа

Тохсунньу дьикти дьыбардаах түүнүгэр
Аптаах Чысхаан оҕонньор, хойуу туманы бүрүйдэ
Муус-маҥан көмүрүө хаар күлүмүрдээн
Тымныы күннэр үүннүлэр.

В. Г. Короленко аатынан Амматааҕы 1 №-дээх орто оскуолата