Сэтинньи 30 күнүгэр Дьокуускай куоракка “Сэргэлээх уоттара” культура киинигэр Өрөспүүбүлүкэтээҕи норуот айымньытын Дьиэтэ таһаарбыт “Тойук” кинигэтэ сүрэхтэннэ. Дьоро күн бастакы чааһа өрөспүүбүлүкэ бастыҥ тойуксуттарын кэнсиэринэн саҕаланна. Манна улуустартан ааттаах-суоллаах тойуксуттар, Олоҥхо Ыһыахтарын тойук күрэҕин, өрөспүүбүлүкэ, улуус таһымнаах күөн күрэстэр кыайыылаахтара кытыннылар. Ол курдук Уус Алдантан Сайдам айар Кыыдана Арылхан кыыһа, Ньурбаттан Анна Матвеева, Бүлүүттэн Людмила Леонтьева, Мэҥэттэн Аксиния Степанова, Хаҥаластан Лидия Харитонова, кылыгырас кылаһахтаах ытык саастаах Прасковья Семенова уонна да атыттар тоҕуоруһа муһуннулар. Үөрүүлээх күммүт иккис чааһа кинигэбит сүрэхтэниитэ. Манна кыттыыны ыллылар тыл үөрэҕин билимин дуоктара, профессор Василий Васильевич Илларионов, гуманитарнай чинчийии уонна хотугу аҕыйах ахсааннаах омуктар кыһалҕаларын үөрэтэр институт аҕа билим үлэһитэ, тыл билимин хандьыдаата, дассыан, П.А.Ойуунускай аатынан бириэмийэ лауреата Мухоплева Светлана Дмитриевна, норуот айымньытын Дьиэтигэр өр сылларга үлэлээбит, салайбыт Саха Өрөспүүбүлүкэтин култууратын үтүөлээх үлэһитэ Надежда Семеновна Толбонова. Норуот айымньытын Дьиэтэ элбэх үлэни оҥорбутун бэлиэтээтилэр, бары бииргэ түмсэн үлэлииргэ ыҥырдылар махталларын биллэрдилэр. Кинигэни оҥорон таһаарбыт Саха Өрөспүүбүлүкэтин култууратын үтүөлээх үлэһиттэрэ Галина Гаврильевна Федорова, Любовь Ивановна Васильева бу кинигэ тахсарыгар көмөлөспүт улуустан кэлбит исписэлиистэргэ махтал сурук, кинигэ бэлэх туттардылар. Ыйынньык кинигэ тойугу кэнчээри ыччакка тиэрдэр сыаллаах тахсыбытын тоһоҕолоон бэлиэтээтилэр.
Кинигэ 1000 солкуобайга П. Алексеев аатынан уулусса 49/1 дьиэтигэр атыыланар. Атыылаһарга тиэтэйиҥ, ахсаана кэмчи!
Билсэр телефоҥҥут: 89644211585