Муус устар 5 күнүгэр ССРС култуууратын туйгуна, хоту сир хоһуун кыыһа Ольга Ильинична Шадрина 70 сааһын туолар өрөгөйдөөх үбүлүөйүн күнэ.
ССРС култууратын туйгуна, култуураҕа 42 сыл үлэлээн баран, билигин бочуоттаах сынньалаҥҥа олорор. Кини 1971 сыллаахха Дьокуускайдааҕы культпросвет училищетыгар үөрэнэн режисер идэтин баһылаабыта уонна култуура эйгэтигэр үлэтин саҕалаабыта.
1973-1974 сс. Орто Халыма норуодунай тыйаатырыгар режиссерунан үлэлээбитэ. 1974 сыллаахха норуодунай тыйаатырдар Өрөспүүбүлүкэтээҕи бастакы телевизионнай бэстибээллэригэр Эрилик Эристиин «Суорума соруктаммыт» диэн пьесатын туруоран, Лауреат үрдүк аатын ылбыттара. Онтон дыраама саха тыйаатырыгар Николай Неустроев «Куһаҕан тыын» диэн пьесатын ситиһиилээхтик туруоран, идэлээх артыыстара, ол пьесаларынан гастроллаан элбэх бөһүөлэккэ көрдөрбүттэрэ.
Ольга Ильинична ситиһиилээх бэриниилээх үлэтин Култуура Министиэристибэтиттэн, комсомол, баартыйа обкомуттан, оройуоннааҕы култуура отделыттан, улуус уонна олохтоох салалтаттан ылбыт сүүһүнэн бочуоттаах кырааматалара, махтал суруктара туоһулууллар. Ону тэҥэ кини аата Саха сирин биллиилээх, бастыҥ үлэлээх култуура, ускуустуба үлэһиттэрин бастакы энциклопедиятыгар киирбитэ.
Ольга Ильинична кулуупка үлэтин таһынан 10-тан тахса араас уопсастыбаннай үлэни толороро, бэтэрээннэр Сэбиэттэрин 15 сыл салайбыта, агитзона, түөлбэ үлэтин 20-тэн тахса сыл салайан кэллэ. Билигин даҕаны бу үлэттэн туора турбат: нэһилиэк түөлбэлэрин салайааччылара, инбэлииттэр түмсүүлэрин бэрэссэдээтэлэ. Кыргыттара Анна уонна Матрена эмиэ култуура үлэһиттэрэ, онон нэһилиэккэ араас тэрээһиннэри ыытарга, тэрийэргэ кини куруук сүбэ-ама буолар. Ити курдук Ольга Ильинична олохтон хаалсыбакка айар үлэнэн дьарыктанар, ыллыы-туойа сылдьар.