Саха өрөспүүбүлүкэтин култууратын үтүөлээх үлэһитэ, Саха сирин бочуотунай бэтэрээнэ, Ньурба куоратын бочуоттаах олохтооҕо Владимир Семенович Лосотов баара буоллар бүгүн кулун тутар 6 күнүгэр 90 сааһын туолуо этэ. Кини 1933 сыллаахха Үөһээ Бүлүү улууһун Үөдүгэй нэһилиэгэр төрөөбүтэ.
Бүлүү бөлөх улуустарыгар кыра уҥуохтаах, мэлдьи камера сүгүүлээх, диктофон тутуурдаах киһини эдэр да эрдэҕинэ, сааһырбытын да кэннэ ыһыахтарга элбэхтик көрөн билэр буолуохтааххыт. Кини Ньурба улууһуттан сылдьар Лосотов Владимир Семенович, Лоһуотап буолар.
В.С. Лосотов оҕо сааһа олох ыарахан кэмнэригэр ааспыта. Кини ханнык да ыарахаттартан чаҕыйбакка, үөрэнэр баҕатын ыһыктыбатаҕа. 1954 сыллаахха Дьокуускайдааҕы культурнай-сырдатар училищены үөрэнэн бүтэрбитэ. Кини иккис дойду оҥостубут Ньурба улууһугар культура эйгэтигэр үлэлии сылдьан олоҥхону, оһуохайы, тойугу бастаан ленточнай магнитофоҥҥа устан, ону сурукка-бичиккэ таһаарар идэтин кулуупка үлэлиирин таһынан дьарыктаммыта. Дьаныардаах үлэтинэн, идэтигэр дириҥ тапталынан баай матырыйаалы хомуйан Бүлүү бөлөх эрэ улуустарыгар буолбакка, бүтүн Саха сирин олохтоохторугар сүдү нэһилиэстибэни хаалларда. Фольклорист –хомуйааччы 1985 сылтан саҕалаан устубут матырыйааллара Саха сиринээҕи гуманитарнай-чинчийэр институт фонотекатын сэдэх матырыйаалларынан буолаллар. Манна оччотооҕу кэм кырдьаҕас тойуксуттара, оһуохайдьыттара үйэтитиллибиттэрэ. Аҥардас кини үлэтин түмүгэр 44 тыһыынчаттан тахса строкалаах сыаналаах матырыйаал барыта сурукка таһаарыллан, чөкөтүллэн фонотекаҕа уурулла сытар, – диэн 1992 сыллаахха тахсыбыт “Норуоттан тахсыбыт талааннар” кинигэҕэ суруллубут.
Бүлүү сүнньүгэр тойук, оһуохай төрүт ырыабыт быһыытынан киэҥник сайынна. Онуоха эдэр көлүөнэни үөрэтии-уһуйуу, сатаан истэр, толорор дьоҕурдарын сайыннарыы үлэтэ утумнаахтык күн бүгүнүгэр дылы ыытыллар. Кэнники сылларга улахан ыһыахтар ыытыллар буоллулар. Онтон ханнык баҕарар ыһыах киэргэлэ оһуохай буолара саарбаҕа суох. Дьэ бу ыытыллар оһуохайдары түүннэри-күннэри иккилии хонук устата тура тэбинэ сылдьан устар дьон ахсааннаах. Онтон Лоһуотап оннук тарбахха баттанар дьонтон биирдэстэринэн буолар.
Билигин кини муспут үтүмэннээх элбэх оһуохайа, тойуга норуот барҕа баайа буолан Лоһуотабы үйэлэргэ ааттатарыгар саарбахтаабаппын.
Владимир Семенович туһунан: Төрүт үгэһи үйэтитээччи фольклорист Владимир Семенович Лосотов / [ хомуйан оҥордо В.С.Лосотов]. – Дьокуускай: Бичик, 2019.–192 с. Кинигэҕэ ааҕыаххытын сөп. Л.И.Васильева
