Владимир Романович Ядреев 75 сааһа

Кулунтутар 4 күнүгэр  1973-1979 ссноруотайымньытынДьиэтиндиректорынанүлэлээбит Владимир Романович Ядреев 75 сааһа бэлиэтэнэр.

Ханнык баҕар тэрилтэ үлэтэ, биллэн туран, кини  салайааччытыттан тутулуктаах. 1973-79 сыллардаахха РНАДь дириэктэринэн Владимир Романович Ядреев, Саха государственнай университетын бүтэрбит эдэр киһи, тэрийэр, дьону көҕүлүүр дьоҕурун көрдөрөн таһаарыылаахтык үлэлээбитэ. Культура, уус-уран самодеятельность араас хайысхаларын сайыннарарга болҕомтотун уурбута.  Чуолаан народнай театрдар үлэлэрин сайыннарыыга, уус-уран коллективтары тэрийиигэ, норуот талааннаах мелодистарын түмэн үлэлэспитэ. Владимир Романович аатырбыт “Сарыал” үҥкүү ансаамбылын тэрийсибитэ (салайааччы –РФ культуратын үтүөлээх үлэһитэ А.Н.Мохотчунова). Ансаамбыл саха үҥкүүтэ сайдыытыгар олук буолбута, бу ансаамбыл репертуарыгар сахалыы үҥкүүлэр баар буолбуттара, салайааччы Александра Николаевна Мохотчунова, хореограф-балетмейстер үөрэхтээх специалист, сахалыы үҥкүүлэри туруорбута. “Сарыал” киэҥник биллэн саха үҥкүүтүн араас дойдуларга көрдөрбүтэ, атын  коллективтарга холобур буолбута. Кинини батыһан элбэх үҥкүү ансаамбыллара тэриллибиттэрэ, репертуардарыгар сахалыы үҥкүүлэри туруорар буолбуттара.

В.Р. Ядреев народнай театрдар үлэлэригэр быһаччы кыттара, театрдар үрдүк таһымҥа тахсалларыгар улахан ирдэбили туруорара, народнай театрдар үлэлэрин тупсарарга аналлаах худсовет үлэлиирэ. В.Р.Ядреев араас фестиваллары бэйэтэ иилээн-саҕалаан тэрийэрэ, народнай театрдар Советскай Союз куораттарыгар баран кыттан кыайан-хотон кэлэр буолбуттара, бу улахан ситиһии буолбута. Владимир Романович театрдар худсоветтарын салайара, худсовет чилиэннэрэ республикаҕа  биллэр ааттаах-суоллаах дьон этилэр, ол курдук, СР иск.үт.деятелэ И.А.Дмитриев, иск. канд. Д.К.Максимов, САССР иск.үт.деятелэ В.Д.Иванов, журналист, СР култ.үт.үлэһитэ Н.И.Максимов, ону таһынан худсовет үлэтигэр драматургтар кытталлара. Худсовет киэҥ далааһыннаах үлэни ыытара: народнай театрдар үлэлэрин репертуардарын көрөрө, улуустарынан айаннаан араас методическай уонна практическай көмөлөрү оҥороро. Владимир Романович маннык улахан профессионаллары салайара, тэҥҥэ быһаарсара, тылын ылыннарара кини үрдүк таһымын көрдөрөр.

Биһиги норуоппут былыргыттан ырыаны өрө тутан ымыы оҥостон олоҕун,  дууһатын иэйиитин ырыанан ыллаан да, айан да туойара. Ол иһин республикабытыгар ырыаны айар дьон – мелодистар диэн баар буолбуттара, кинилэри норуот сөбүлүүрэ, ааттарын билэрэ. Мелодистара суох биир да кэнсиэр барбат, бырааһынньык буолбат этэ, дьон-сэргэ умсугуйан туран кинилэр ырыаларын ыллыыллара. Мелодистар бэйэлэригэр хаатыйаланан сылдьаллара, кинилэри түмэ тардан, айар үлэлэригэр көмө буоларга соруктаах саха мелодистарын республикатааҕы түмсүүтүн  тэрийэргэ быһаарыы ылыммыттара. Владимир Романович музыкаҕа методистыын Анатолий Николаевич Семеновтыын 1978 сыллаахха Намҥа республика  мелодистарын мунньан мелодистар  түмсүүлэрин  тэрийэргэ көҕүлээбиттэрин мустубут ырыа куттаах дьон өрө көтөҕүллэн туран ылыммыттара уонна бастакы тэрээһин мунньаҕын ыыппыттара. Дьэ, онтон ыла мелодистар түмсэннэр улахан хамсааһын тахсыбыта кэскиллээх буолбута. Түмсүү сайдан кэлин мелодистар Ассоциациялара, онтон бүгүн  ырыа айааччылар Союзтара республикаҕа биир бөдөҥ общественнай холбоһук буолан үлэлии-хамсыы сылдьаллар.

В.Р.Ядреев оччолорго ыытыллар Саха сирин культуратын, искусствотын көрдөрөр араас тэрээһиннэри тэрийсэн ыытыыга саамай тутаах киһи буолара. Ол курдук, 1982 сыллаахха Москваҕа, Ульяновскай уобаласка ыытыллыбыт элбэх кыттаачылаах Саха сирин культуратын уонна искусствотын Күннэригэр улахан түбүктээх тэрээһин үлэтин сатабыллаахтык ыыппыта.

Владимир Романович киһи быһыытынан, көстөр көстүүтүнэн, таҥна-сапта сылдьарынан олус интеллигентнай, аккуратнай, ханан да сыыс-буор сыстыбатах киһитэ этэ. Суруксут бэрдэ, араас ирдэнэр докумуоннары оҥоро охсоро, дакылаат да суруйара. Аны олус юмордааҕа, бэтиэхэлээҕэ, киһи туспатын сөрү-сөпкө бэлиэтиирэ уонна үүт-үкчү үтүктэн биэрэн күллэрэрэ. Кини бииргэ үлэлиир доҕорунаан Прокопий Николаевич Афанасьевтыын юмордаан, күлүүлээҕи кэпсээтэхтэринэ бэйэтэ көр-күлүү театрын санатара,  оннук талааннаах, сэргэх дьон этилэр. Мин Владимир Романовичка махтана саныырым диэн кини уопуттаах киһи буолан миэхэ сүбэлээн-амалаан, бэрт үчүгэйдик уонна таһаарыылаахтык өр бииргэ үлэлээбиппит буолар.

Надежда Семеновна Толбонова ахтыыта.

“Дому народного творчества – 85 лет”, 2017 кинигэттэн