РСФСР култууратын үтүөлээх үлэһитэ, СССР суруйааччыларын союһун чилиэнэ, Саха АССР искусстволарын үтүөлээх деятелэ, Үлэ Кыһыл знамя уордьанын икки төгүллээх кавалера, Сунтаар улууһун бочуоттаах олохтооҕо, норуот ырыаһыта Сергей Афанасьевич Зверев- Кыыл Уола төрөөбүтэ 120 сылыгар аналлаах Ытык Бэлиэ кулун тутар 14-19 күннэригэр Таатта улууһугар сырытта.
Таатта улууһугар кулун тутар 14 күнүгэр сылын аайы ыытыллар “Олоҥхо сатабыллара” этнокультурнай фестиваль программатын чэрчитинэн Уус-Алдан улууһун делегациятыттан Ытык Бэлиэ туттарылынна.
Олоҥхо сатабылларын күнүгэр “Айыы тылынан арчыланан” ыччат ортотугар олоҥхону бөлөҕүнэн толоруу күрэһэ тэриллиннэ. Ол күн төрүт омук ураты тыынын, туундара тойугун, өрүкүйэр тэтимин илдьэ сылдьар аар-саарга аатырбыт “Эргырон” ырыа-үҥкүү ансаамбыла саха норуотун маанылаах ытык оһуохайыгар кыттыстылар. Оһуохайы эдэр кэнчээри ыччаппыт, Уолба орто оскуолатын 10 кылааһын үөрэнээччитэ Альбина Семенова, СР Дархан этээччитэ Мотрена Порядина таһаардылар
Бэлиэ ити күн Таатта Үс Амматын: үс ини-бии быйылгы үбүлүөйдээх саха бастакы учуонай-бөлүһүөгэ, философскай наука доктора, РФ наукатын үтүөлээх деятелэ, СГУ бастакы ректора Авксентий Егорович Мординов, Саха сирин народнай суруйааччыта Николай Егорович Мординов-Амма Аччыгыйа, СР үтүөлээх учуутала, сэрии ветерана Трофим Егорович Мординов төрөөбүт түөлбэлэрэ Харбалаах, прозаик Г.Д.Бястинов-Бэс Дьарааһын дойдута Чымынаайы, Саха сирин народнай суруйааччыта С.Р. Кулачиков-Эллэй төрөөбүт Чычымах – ытык сирдэринэн айаннаата.
Кулун тутар 16 күнүгэр Уус-Амма (Чымынаайы) нэһилиэгэр Ытык Бэлиэни нэһилиэк олохтоохторо, уһуйаан иитиллээччилэрэ, оскуола үөрэнээччилэрэ көрүстүлэр. Бу күн Чымынаайытааҕы модельнай библиотека үлэһитэ В.В. Белолюбская С.А.Зверев олоҕун, айар үлэтин туһунан кинигэ быыстапкатын, презентационнай матырыйаал көрдөрөн сиһилии кэпсээтэ, Сунтаар улууһугар Кыыл Уолун аатын сүгэр музейын видеослайдынан көрдүлэр, нэһилиэк талба талааннаахтара хомуска оонньоон, сахалыы үҥкүүлээн, тойук туойан, олоҥхо толорон ытык киһиэхэ анаммыт күн үрдүк таһымҥа ааста.
Кулун тутар 17 күнүгэр Уус-Амма (Чымынаайы) нэһилиэгин делегацията Ытык Бэлиэни Орто-Амма (Харбалаах) нэһилиэгэр туттарда. Нэһилиэк баһылыгын солбуйааччыта Б.И.Дайбанныров эҕэрдэ тылынан көрүстэ. Фольклору сэҥээрээччилэр сахалыы ырыа-тойук, хомус тэрээһинин тэрийдилэр.
Кулун тутар 18 күнүгэр Орто-Амма (Харбалаах) нэһилиэгин делегацията Амма (Чычымах) нэһилиэгэр туттарда. Сарсыарда аҕам саастаахтар түмсүүлэрэ боҕуруоскай отунан тэрээһини арчылаан көрүстүлэр. Тэрээһини улуустааҕы “Айыы тылынан арчыланан” ыччат ортотугар олоҥхону бөлөҕүнэн толоруу күрэһин 2 миэстэлээх “АЙЫЛГЫ” ыччат бөлөҕө (салайааччы Т.А. Кириллина) П.А.Ойуунускай “Дьулуруйар Ньургун Боотур” олоҥхо 7 ырыатын толорон саҕалаатылар. С.А.Зверев туһунан иһирэх кэпсэтии буолан ааста.
Кулун тутар 19 күнүгэр Амма (Чычымах) нэһилиэгин делегациятын кытта “Амма нэһилиэгэ” МТ баһылыгын солбуйааччыта Ефимова И.П. эҕэрдэлээн туран Ытык Бэлиэни Улуустааҕы норуот айымньытын дьиэтин коллективын ортотугар директор Вырдылин Г.Г. туттарда.
И.А.Аргунов аатынан улуустааҕы кииннэммит библиотекаҕа С.А.Зверевкэ анаммыт кинигэ быыстапката туруоруллунна. Сырдык кэриэһигэр анабыл уонна бэйэтэ айбыт хоһооннорун:
• Таатта улууһун ыччат уонна дьиэ-кэргэн политикатын управлениятын начальнига, СР Үтүөлээх этээччитэ, олоҥхону толорооччу Иванов И.Ф. норуот ырыаһыта Е.Захарова “Уруйдан, умнуллубат куолас!”;
• И.А.Аргунов аатынан улуустааҕы кииннэммит библиотека сүрүн библиографа Ефремова С.В. норуот ырыаһыта С.Зверев бэйэтин ыччат дьоҥҥо анаабыт “Ыстаал ньыгыл кэккэнэн”;
• Улуустааҕы “Уран тыл” литературнай түмсүү кыттыылааҕа, олохтоох ааптар Стручков В.П. -Сахамыын С.В. С.Зверев “Саас кэлиитэ” хоһооннорун аахтылар.
