Аар-саарга аатырбыт Сергей Афанасьевич Зверев – Кыыл Уола төрөөбүтэ 120 сылыгар аналлаах өрөспүүбүлүкэтээҕи “Ытык бэлиэни” туттарыы хамсааһына буолла. Кулун тутар 1 күнүгэр Горнай улууһун Ааһыма нэһилиэгэр буолбут бу эппиэтинэстээх тэрээһиҥҥэ Кэбээйи улууһун аатыттан Мукучу кэрэ эйгэтин оскуолатын дэлэгээссийэтэ кыттыыны ылла.
Ытык Бэлиэни туттарыы туомугар Мукучу кэрэ эйгэтин оскуолатын исписэлиистэрэ Борисова Анна Павловна, СӨ култууратын туйгуна, үөрэх чааһыгар дириэктэри солбуйааччы; Макарова Айталина Григорьевна, СӨ култууратын туйгуна; Ботуева Степанида Васильевна, фольклор салаатын педагога; Кычкина Анна Григорьевна, СӨ култууратын туйгуна, педагог сырыттылар.
Мэҥэ бэлиэни Горнай улууһун култуураҕа уонна духуобунай сайдыыга управлениетын начаалынньыгын солбуйааччыта Алексеева Софья Никитична туттарда, дэлэгээссийэ салайааччыта Борисова Анна Павловна «Кэбээйи улууһа» диэн суругу уонна саламаны баайан алгыс сиэрин-туомун тутуһан Кэбээйи улууһугар аҕаллылар.
Салгыы Ытык Бэлиэни Мукучу, Лүүчүн, Лүксүгүн, Кэбээйи, Куокуй нэһилиэктэринэн сырытыннаран кулун тутар 5 күнүгэр Сангаар бөһүөлэгэр кэллэ. Тэрээһиннэр үрдүк таһымнаахтык нэһилиэнньэ бары араҥатын хабан ыытылыннылар. Ол курдук Сунтаартан төрүттээх дьон дойдуларын, биир дойдулаахтарын, Сергей Зверев ансамблын кыттыылаахтарын туһунан кэпсээннэрэ дьону-сэргэни сэргэхситтэ.
9 оһуор мэҥэ хамсаныыны хас сылдьыбыт сирин аайы оҕолуун-уруулуун, эдэрдиин-эмэнниин бука бары толорбуттара тэрээһини ситэрэн биэрдэ. Бу Ытык Бэлиэни норуот түмсүүлээхтик сомоҕолоһон үөрүү-көтүү аргыстаах, үнкүү-битии доҕуһуоллаах, оһуокайдаан дьиэрэтэн сэргэхтик түмүктээн, Нам улууһун делегациятыгар туттардылар.
