РСФСР култууратын үтүөлээх үлэһитэ, ССРС суруйааччыларын Союһун чилиэнэ, Саха АССР искусстволарын үтүөлээх деятелэ, Үлэ Кыһыл Знамята уордьанын икки төгүллээх кавалера, Сунтаар улууһун Бочуоттаах олохтооҕо, норуот ырыаһыта Сергей Афанасьевич Зверев-Кыыл Уола төрөөбүтэ 120 сылыгар анаан удьурҕай тэллэхтээх, сиэдэрэй ситиилээх Аар Баҕах сэргэлээх, кыһыл көмүс солотуулаах Кыыл Уола бюстаах Сунтаар уустара Тамара Афанасьева, Иннокентий Иванов ураннаан оҥорбут ЫТЫК БЭЛИЭЛЭРЭ Сергей Афанасьевич төрөөбүт Ыгыаттатыттан Саха сирин үрдүнэн ыытыллар марафонун чэрчитинэн республика 18 улуустарын устун айаҥҥа турбута. Дуорайа тохтор дорҕоон тойуктаах, 9 мэҥэ хамсаныылаах оһуордаах үҥкүүлээх, түөлбэ күөлү төгүрүйэ тэнийэр оһуокай оонньуулаах Аар тайҕа Улуу тойуксута ыллаан-туойан, үҥкүүлээн ааспыт айанын суолунан кини үөһээлэртэн үөттэриилээх, айыылартан айдарыылаах аналыгар сүгүрүйүү, айар үлэтин тарҕатыы, норуот үүнэр көлүөнэтигэр тиэрдии дьоһун суолталаах.
Ытык Бэлиэ Үөһээ Бүлүү Кэнтигиттэн Бүлүүгэ кэлэн олунньу ый 21-24 күннэригэр кини үөрэнээччитэ, билиҥҥи кэмҥэ саха фольклорун уһулуччулаах толорооччута, тарҕатааччыта Саха Республикатын культуратын үтүөлээх үлэһитэ, Саха сирин хас да төгүллээх Аан Дархан этээччитэ Семен Иннокентьевич Иванов-Чочу Сэмэнэ олорор Чочу, кэнчээри ыччаты олоҥхоҕо, оһуокайга дьоһуннаан дьарыктаан улууспутун ааттатар Тааһаҕар, С.И. Еремеев-Дэдэгэс Ыстапаан, А. С. Васильев-Хоохура, Т.П. Гоголев – Олоҥхоһут Доропуун, В.О. Каратаев – Харатай Баһылай курдук олоҥхоһуттар уутуйан үөскээбит Бороҕон нэһилиэктэригэр сырытта. Дьаһалларга Чочу нэһилиэгин баһылыга П.А. Догоюсов, Тааһаҕар нэһилиэгин баһылыгын солбуйааччыта Р.С. Осипова, Бороҕон нэһилиэгин баһылыгын солбуйааччыта А.А. Колтовская кыттыннылар. Семен Иннокентьевич Учууталын туһунан истиҥ-иһирэх ахтыыны олордо, “Сарсын, сарсын сарсыарда” ырыатын ыллаата, үөрэн-көтөн, долгуйан туран оһуокай түһүлгэтин төрүттээтэ.
Олунньу 25 күнүгэр В.О. Каратаев аатынан Олоҥхо Дьиэтигэр улууспут баһылыгын бастакы солбуйааччы Иван Иванович Евсеев “Ытык Бэлиэни” Горнай улууһун культураҕа уонна духуобунаска управлениетын кылаабынай специалиһа Елизавета Алексеевна Семенова салайааччылаах, Кировскай нэһилиэгиттэн баһылык Егор Егорович Дьячковскай, тойуксут, үҥкүүһүт, норуот ырыатын толорооччу Иннокентий Петрович Терентьев, мас ууһа Виталий Александрович Юшманов, “Даҕай” фольклорнай бөлөх кыттааччыта Герман Петрович Попов, сынньалаҥ Киинин уус-уран салайааччыта Сахая Николаевна Федотова кыттыылаах делегацияҕа элбэх дьон-сэргэ ортотугар туттарда. Тэрээһин кыттыылаахтара Зверев “Оһуорун үҥкүүтүгэр” олоҕурбут 9 Мэҥэ Хамнаныыны толордулар. “Саха сирин үтүөлээх этээччитэ” уонна С.Зверев 100 сыллаах үбүлүөйүн кыһыл көмүс бэлиэлэрин хаһаайката Каролина Харлампьева, Саха Республикатын культуратын туйгуна Николай Афанасьев-Айдаман, ыалдьыт Иннокентий Терентьев оһуокай добун түһүлгэтин тартылар. Тэрээһиҥҥэ В.О. Каратаев аатынан олоҥхо коллектива (салайааччы С.Т. Иванова), И.М. Гоголев аатынан народнай театр (режиссер М.А. Соколова), “Айылгы” ырыа-үҥкүү народнай коллектива (салайааччы В.В. Томскай), “Бүлүү долгуннара” үҥкүү народнай коллектива (салайааччы С.Е. Зинурова), Чернышевскайдааҕы музыкальнай оскуола фольклорнай кылааһа (салайааччы А.П. Семенова), Советскай Союз Геройа Н.С. Степанов аатынан оскуола 5 “б” кылааһын “Дьүрүл” фольклорнай ансамбла уонна Г.С. Донской аатынан начальнай оскуолатын 1 “в” кылааһын үөрэнээччилэрэ, “Ыллык түмсүү” (салайааччы В.С. Николаев), “Стимул” түмсүү (салайааччы Е.Я. Сивцева), “Алаһа” түмсүү (салайааччы Е.Г. Алексеева) , “Хаһаайыска” түмсүү (салайааччы С.П. Калачикова), общественнай түмсүүлэр (салайааччы М.П. Томская), “Лөкөчөөн общественниктара” (салайааччы А.А. Никифоров) олус көхтөөхтүк кыттан тэрээһин үрдүк таһымнаахтык ыытылынна.
