Кыыл Уолун Ытык бэлиэтэ Үөһээ Бүлүүгэ кэллэ
РСФСР култууратын Үтүөлээх үлэһитэ, ССРС суруйааччыларын Сойууһун чилиэнэ, Саха АССР искусствотын Үтүөлээх диэйэтэлэ, «Үлэ Кыһыл Знамята» уордьан II төгүллээх кавалера, Сунтаар улууһун Бочуоттаах олохтооҕо, норуот ырыаһыта, тойуксута, олоҥхоһута, оһуохайдьыта Сергей Афанасьевич Зверев – Кыыл Уолун төрөөбүтэ 120 сылын арыйар үтүө тэрээһиннэр төрөөбүт дойдутуттан Ыгыаттаттан, Түбэй Дьаархантан саҕаламмыттара.
Саха чулуу, дэгиттэр талааннаах киһитигэр Кыыл Уолун албан аатыгар сүгүрүйэн, биир дойдулаахтара, удьурхай тэллэхтээх, Сергей Зверев бюстаах, ыһыах бастыҥ киэргэлэ Аар баҕах сэргэлээх гына Сунтаар улууһун маастардарыгар Ытык бэлиэ оҥорторбуттара. Бу үбүлүөйнэй бэлиэ Саха сирин 18 улууһун кэрийэн, Сергей Зверев кэриэһигэр ыытыллар аар-саарга аатырбыт Сунтаардар ыһыахтарыгар эргийэн, төннөн кэлэн тиксиэхтээх.
Ол курдук олунньу 15 күнүгэр Үөһээ Бүлүү дьаһалтатын саламтата Ньурба куоратыгар баран, Ытык бэлиэни үөрүүлээх быһыыга-майгыга ылан, аны Үөһээ Бүлүү улууһугар аҕаллылар. Бу улахан суолталаах тэрээһин чэрчитинэн Үөһээ Бүлүүгэ, Кэнтиккэ араас олоҥхоҕо сыһыаннаах култуурунай тэрээһиннэр былааннаахтык ыытылыннылар. Сергей Зверев – Кыыл Уолун Ытык бэлиэтэ Уөһээ Бүлүү оскуолаларын кэрийдэ. Ытык Бэлиэ олунньу 20 күнүгэр Бүлүү улууһун делегациятыгар үөрүүлээх быһыыга туттарыллынна.
