Республикатааҕы норуот айымньытын Дьиэтэ уонна “Смарт 2.0.3.” библиотека олунньу 18 күнүгэр Нам улууһун Хатырык нэһилиэгин “Сайдам” сынньалаҥ Киинин иһинэн үлэлиир уран тарбахтаахтар түмсүүлэрин быыстапкатын тэрийдилэр. Алгыстаах арыллыы сиэрин-туомун сынньалаҥ Киин дириэктэрэ Елена Ефремова ыытта. Кэлбит ыалдьыттары алаадьынан айах тутан көрүстүлэр. Смарт библиотека саалыгар толору мустубут дьон тыл этээччилэри дохсун ытыс тыаһынан көрүстүлэр. Республикатааҕы норуот айымньытын Дьиэтин салайааччыта Сергей Семенов бу тэрээһин тыа кулуубун иһинэн үлэлиир уран тарбахтаахтар түмсүүлэрин айар сатабылларын көрдөрөр быыстапкалара уонна маастар кылаастары ыытыыга бастакы тэрээһин буоларын бэлиэтээтэ. Маннык көрүү-куонкурус саҕаламмытынан эҕэрдэлээтэ уонна сыл бүтүүтэ ахсынньы ыйга түмүктэнэрин эттэ.
“Сайдам” сынньалаҥ киин методиһа Ульяна Наумова уран тарбахтаахтар араас көрүҥнээх түмсүүлэрин сайдыыларын, ситиһиилэрин сиһилии кэпсээтэ. Мантан салгыы төгүрүк остуол ыытыллан кыттааччылар баҕа санааларын этиннилэр. Айар-тутар дьоҕуру уонна маастар кылаастары элбэтэргэ, видео-уруоктары оҥорорго, методическэй көмөнү ыытарга этии киллэрдилэр. Бу кэпсэтии кэнниттэн бары маастар кылаастарга тарҕастылар, эрдэ бэлэмнээбит остуолларын тула сөбүлүүр дьарыктарын булан олордулар.
Оҕуруонан тиһиигэ – Заровняева Лена Ивановна, кыбытык тигиигэ – Павлова Екатерина Константиновна, туостан тигиигэ – Тамара Галиновна, Валентин Титович Васильевтар, НХП маастардара, бытырыыстаах былааты оҥорууга – Соропова Надежда Васильевна, фоамирантан сибэкки оҥорууга – Матвеева Ольга Валерьевна, туойга оһуор түһэриитин Яковлева Ньургуйаана Вильямовна иилээн-саҕалаан үөрэттилэр.
“Сайдам” сынньалаҥ Киин түмсүүлэрин айар күннэригэр ыҥырыллан уонна истэн кэлбит көрөөччүлэр смарт библиотекаҕа үктэммиттэриттэн, тэрээһин үрдүк таһымнаахтык барбытыттан астыммыттарын биллэрдилэр. Маастар-кылааһы өйдөнүмтүөтүк уонна туһалаахтык ыыппыттарын эттилэр. Уопсайа маастар аайы биэстии, уоннуу киһи суруйтаран дьарыктаннылар. Үөрүүлээх тэрээһин түмүктэниэр диэри 70-тан тахса киһи дьарыктанна.
