Өрөспүүбүлүкэтээҕи Норуот айымньытын дьиэтэ норуот тылынан уус-уран айымньытын араас көрүҥнэрин тарҕатыыга, киэҥ эйгэҕэ таһаарыыга, айар талааннаахтары өйөөһүнү,үйэтитиини болҕомтоҕо ылан киэҥ хабааннаах улэ араас хайысхаларын олоххо көдьүүстээхтик киллэрэр.
Саха Өрөспүүбүлүкэтин үрдүнэн муус устар 7 күнүттэн “Куйаар далай түһүлгэ” (Священный круг) оһуокай тылын этээччи ыччаттарга туһуламмыт күрэх нэһилиэктэринэн киэҥ хабааннаахтык саҕаланна.
Өрөспүүбүлүкэтээҕи күрэх сыала-соруга: норуот баарҕа баайын, тылынан уус-уран айымньытын ураты көрүҥүн -оһуокайы киэҥ эйгэҕэ таһаарыы, эдэр ыччаты уһуйуу, саҥа талааннары арыйыы.
“Куйаар далай түһүлгэ” күрэх Саха өрөспүүбүлүкэтин Бырабыытылыстыбатын өйөбүлүнэн, Саха Өрөспүүбүлүкэтин Култуураҕа уонна духуобунай сайдыыга министиэристибэтэ көҕүлээһининэн, Өрөспүүбүлүкэтээҕи Норуот айымньытын дьиэтин тэрийиитинэн муус устар 7 күнүттэн ыам ыйын 25 күнүгэр диэри ыытыллар.
Аан бастакынан Сунтаар улууһугар саҕалаан тэрээһин үрдүк таһымнаахтык ыытылынна, тилэх баттаһа Амма, Таатта, Мэҥэ-Хаҥалас, Уус-Алдан улуустара бэлэмнэнэллэр.
Ол курдук Сунтаар улууһа муус устар 7күнүгэр саҕалаан “Олоҥхо дойдутун оһуордаах оонньуута” улуустааҕы күрэх ыытыллан муус устар 18 күнүгэр кыайыылаахтар быһаарыллан өрөспүүбүлүкэтээҕи үһүс түһүмэххэ Дьокуускай куоракка кыттар быраабы ылан үөрүүлэрэ үксээтэ.
Муус устар ый 18 күнүгэр. С.А.Сибиэрэп – Кыыл Уолун аатынан улуустааҕы норуот айымньытын киинигэр “Куйаар далай түһүлгэ” диэн улуустааҕы үҥкүү түһүлгэтэ тэриллэн ыытылынна. Бу түгэн дорҕоонноох тойуктаах, ыллам ырыалаах, киэҥ далай түһүлгэлээх Кыыл Уола 125 үбүлүөйдээх сылыгар уонна иккис Улуу Кыайыы 80 сылларыгар ананна.
Бу күрэскэ кулун тутар ыйдарга нэһилиэктэринэн ыытыллар “Олоҥхо дойдутун оһуордаах оонньуута” фольклорнай бэстибээл чэрчитинэн ыччаттар ортолоругар саҥа уонна идэтийбит этээччилэргэ диэн ааттаан күрэс ыытыллыбыта бу күрэс, бастакы түһүмэҕэ буолла. Бу күҥҥэ күрэс иккис түһүмэҕэ ыытыллан кыайыылаахтар сүүмэрдэнэн, быһаарыллан ыам ыйыгар ыытыллар эдэр ыччат оһуокайыгар барарга бэлэмнэнэллэр. Ол курдук Элгээйиттэн Карина Попова, Тэҥкэттэн Клим Петров, Федор Попов, Аллыҥаттан Мотрена Амонова, Хадантан Саина Чайнова, Дьаархантан Сахаайа Данилова, Элгээйиттэн Михаил, Айсена Федоровтар, Кутанаттан Сахаайа Кузьмина.
