Тылы харыстыыр, үйэтитэр уонна сайыннарар сыаллаах государственнай программа чэрчитинэн Саха Өрөспүүбүлүкэтин министерствотын культуратын уонна духуобунаһын өйөөһүнүнэн, Өрөспүүбүлүкэтээҕи норуот айымньытын дьиэтэ көҕүлээһининэн ахсынньы ый 11 күнүгэр Семен уонна Софрон Даниловтар ааттарынан культура дыбарыаһыгар Горнай улууһун Бэрдьигэстээх нэһилиэгэр «ТуоС» – тыл уонна сатабыл саха тылыгар 9-11 кылаас оҕолоругар интеллектуальнай оонньуу ыытылынна.
Афанасий Николаевич Осипов аатынан Бэрдьигэстээх орто оскуолатыттан 2 хамаанда, Семен Петрович Данилов аатынан Бэрдьигэстээх орто оскуолатыттан 2 хамаанда, Василий Васильевич Филиппов аатынан Бэрдьигэстээҕи гимназияттан уопсайа 5 хамаанда кыттыыны ылла. Күрэх 5 түһүмэҕинэн ыытылынна:
1 түһүмэх. Бэйэни билиһиннэрии видеоролига.
2 түһүмэх. Саха тылын билиитин тургутуу.
3 түһүмэх. Араас темалаах интерактивнай оонньуу.
4 түһүмэх. Саха төрүт атах оонньуута.
5 түһүмэх. Өйтөн айымньы айан таһаарыы.
Тыҥааһыннаах күрэх түмүгүнэн:
1 миэстэ – «Ситим» С.П.Данилов аатынан орто оскуола 1-кы хамаандата.
2 миэстэ – «Чыпчаал» С.П.Данилов аатынан орто оскуола 2-с хамаандата.
3 миэстэ – «Кэскил» хамаанда В.В.Филиппов аатынан гимназия.
Миэстэлэспит хамаанда сыаналаах бирииһинэн, кубогынан наҕараадаланна. Хас биирдии кыттааччы оҕо тэрийээччилэртэн бэлэх тутта.
Оҕолор төрөөбүт төрүт тылларын билиилэрин хаҥатан, үөрэ-көтөн чаҕылыһан тарҕастылар.
Олунньу 13 күнүгэр – тыл уонна сурук-бичик күнүгэр Дьокуускай куоракка өрөспүүбүлүкэ таһымнаах күрэххэ кыайыылаах хамаанданы күүтэбит!
