Ыам ыйын 17 күнүгэр Покровскай куоракка Өктөм нэһилиэгин «Арылы кустук» худуоһунньуктар түмсүүлэрэ тэриллибитэ 5 сылыгар анаммыт «О прошлом-для будущего на холсте художника» – диэн ураты ис хоһоонноох быыстапка арыллыыта буолан ааста. Быыстапкаҕа Өктөм нэһилиэгин историятын Тыгын үйэтиттэн саҕалаан билиҥҥи кэм историятын, дьонун-сэргэтин туһунан 10 айар худуоһунньуктар 162 хартыыналарыгар дьүһүйбүттэрэ кэлбит дьон болҕомтотун тарта. «Арылы кустук» худуоһунньуктар түмсүүлэрин Өктөм оскуолатын учуутала Габышева Любовь Николаевна бэһис сылын салайан ыытар, дьарыктыыр.
Улуу Эркээни хочотун уонна Өктөм нэһилиэгин историята норуокка, чуолаан эдэр көлүөнэҕэ уруһуй нөҥүө кэбэҕэстик тарҕанарын туһугар туруулаһан дьарыктаналлар нэһилиэк талааннаах дьоно Анатолий Лиханов, Раиса Охлопкова, Любовь Габышева, Иванна Слепцова, Андриан Белолюбский, Иван Христофоров, Оксана Филиппова, Вера Алексеева, Варвара Шевелева. Хара бастакыттан сөптөөх литератураны, араас сэдэх матырыйааллары булан-көрдөөн биэрэр истиҥ сүбэһитинэн, көмөлөһөөччүнэн буолар олохтоох библиотекарь Мотрена Егоровна Павлова. Тарбахтарыгар талааннаах, туох да үлэттэн толлон турбат, элбэх оҕолоох ийэлэр, аҕалар, үгүс сиэннэрдээх эбээлэр, эһээлэр тустаах үлэлэриттэн быыс булан, сылтан сыл аайы саҥа бырайыактары олоххо киллэрэр дьиҥнээх улууспут патриоттара.
Ол курдук 2023 сыллаахха Үлэ сылыгар анаан төрөөбүт нэһилиэктэрин уордьаннаах туруу үлэһиттэрин мөссүөннэрин түһэрэн 20-тэн тахса хартыынаны уруүйдаабыттарын сөҕө-махтайа, киэн тутта көрдүбүт. Үгүс үлэ биир дойдулаахпытыгар, хаҥаластан Саха сирин бастакы президеныгар,чулуу уолбутугар Михаил Николаевка анаммыт. Түмсүүгэ дьарыктанар талааннаах дьоммут биир киһи курдук сүбэлэрин холбоон, олоҕу кытта тэҥҥэ хардыылаан, Хаҥаласпыт баай историятын үөрэтэн билэн, дьоммут-сэргэбит ааттарын, историябытын үйэтитэн көрдөрөн иитэр-үөрэтэр үлэҕэ, кыраайы үөрэтиигэ олус элбэҕи айа-тута, үлэлии-хамсыы сылдьаллар.
Галина Семенова
Ыам ыйын 20 к. 2024с